Генеральны пракурор Андрэй Швед уручыў пашпарт грамадзяніна Рэспублікі Беларусь дзецям калег

Сёння ў Беларускім дзяржаўным музеі гісторыі Вялікай Айчыннай вайны Генеральны пракурор Рэспублікі Беларусь Андрэй Швед уручыў пашпарты дзецям і ўнукам пракурорскіх работнікаў і работнікаў пракуратуры.

Мерапрыемства прымеркавана да Дня Канстытуцыі Рэспублікі Беларусь у рамках Усебеларускай акцыі «Мы – грамадзяне Беларусі!».

Звяртаючыся да юных патрыётаў сваёй Радзімы, Андрэй Швед сказаў: «Свой пашпарт вы атрымаеце ў Музеі гісторыі Вялікай Айчыннай вайны. Мы невыпадкова вырашылі правесці тут гэтае мерапрыемства. Гэта звязана з тым, што, па-першае, мы робім гэта ў Год гістарычнай памяці. Па-другое, вельмі важна, каб кожны з вас зразумеў, якая была Вялікая Перамога 9 мая 1945 года. Няхай кожны з вас разбярэцца ў тым, што было. Неабходна ўсвядоміць вельмі важную рэч: вы – носьбіты праўды, вы – носьбіты перамогі, найвялікшай перамогі... Трэба берагчы нашу краіну, трэба разумець, што іншай зямлі, як гаварыў Кіраўнік дзяржавы, у нас няма... І на вашых плячах, калі вы вырасціце, будзе адказнасць за тое, каб наша краіна і далей развівалася, каб наша краіна і далей была незалежнай і квітнеючай дзяржавай».

Уручыўшы маладым людзям пашпарты, Канстытуцыю Рэспублікі Беларусь і падарункі, Генеральны пракурор пажадаў ім мірнага неба над галавой, здароўя, дасягнення пастаўленых мэт, поспехаў ва ўсіх пачынаннях на карысць Радзімы.

Пасля гэтага перад удзельнікамі мерапрыемства з нумарамі выступілі творчыя калектывы ўстаноў вышэйшай адукацыі.

У завяршэнне мерапрыемства для дзяцей і іх бацькоў была праведзена экскурсія па выставачнай зале «Генацыд беларускага народа ў гады Вялікай Айчыннай вайны».

У рамках мерапрыемства Андрэй Швед таксама паразмаўляў з прадстаўнікамі сродкаў масавай інфармацыі.

Відэатрансляцыю вёў Выдавецкі дом «Беларусь Сёння» https://www.youtube.com/watch?v=BAK64OVTyns

Фота: СБ. Беларусь Сёння, Sputnik.by

Упраўленне ўзаемадзеяння са СМІ
і рэдакцыйнай дзейнасці
Генеральнай пракуратуры